Ik laup euver de kleinste winkelstraot van ôs ‘stedje van lol en plezeer’ en op de kruutsing met de grötste winkelstraot enqueteren ‘werkstudenten’ veur WWF en eintje vruëg: ‘Mag ik u een vraag stellen?’

Ik zeg: ‘Jao zeker, vraog maar’, en banjer gewoën door... op eur pumps trippel-trappelt 't maedje enthousiast euver de kasseie achter mich aan en vruëg: ‘Wat is uw favoriete dier?’

Nao mien antwoard: ‘Zwaardvis’, begint dae schat op 't formulier te krabbele, wies det ik de aanvulling ‘in dillesaus’ oetspraek... Dao stopt ut tikke van de hakke op de kinderköpkes.